Kryetarja e Komunës së Preshevës, Shabani Sinani, ka pritur në një takim zyrtar homologun e saj nga Korça, Kryetarin Sotiraq Filo, pas një vizite të zhvilluar më herët në qytetin e Korçës. Gjatë këtij takimi, të dy liderët nënshkruan marrëveshjen e binjakëzimit ndërmjet dy komunave, një hap i rëndësishëm për forcimin e marrëdhënieve dhe bashkëpunimin mes tyre.
Në një postim në Facebook, kryetarja Sinani theksoi rëndësinë e këtij binjakëzimi, duke theksuar mundësitë që do të krijohen për bashkëpunim në fusha të ndryshme si arsimi, kultura, sporti, zhvillimi ekonomik dhe turizmi. “Ky hap i rëndësishëm hap rrugë për bashkëpunim në arsim, kulturë, sport, zhvillim ekonomik e turizëm, duke forcuar lidhjet tona”, shkruan Sinani në postimin e saj.
Ajo gjithashtu falënderoi Ambasadën e Shqipërisë në Beograd për mbështetjen e vazhdueshme dhe shprehu mirënjohje për institucionet arsimore dhe kulturore që përfaqësuan dinjitetshëm interesat e qytetarëve të Preshevës.
Ky binjakëzim shënon vetëm fillimin e një partneriteti të ri, që do të sjellë mundësi të reja dhe zhvillim për qytetin e Preshevës, duke hapur horizonte të reja për të dy komunat./LUGINALAJMI/
