Ministri për të Drejtat e Njeriut, të Drejtat e Pakicave dhe Dialogun Shoqëror, Demo Berisha, ka deklaruar se tri këshilla kombëtare të pakicave në Serbi janë identifikuar si problematike për shkak të, siç tha ai, lidhjeve të tepruara me vendet e tyre të origjinës. Sipas tij, këto këshilla janë ai kroat, bullgar dhe veçanërisht ai shqiptar.
Duke folur për Këshillin Kombëtar Shqiptar, Berisha u shpreh se ai është “në një udhë pa orientim” për sa i përket vendit të origjinës. “Nuk e dinë se nga e kanë prejardhjen – janë kthyer nga Prishtina, dhe jo nga Shqipëria. Kjo nuk duhet të lejohet”, deklaroi ai, shkruan NIN, përcjell LUGINALAJMI.
Sipas tij, ekziston një tendencë që, nëpërmjet lirisë së tubimit dhe Ligjit për Pakicat Kombëtare, të keqpërdoren fondet publike. “Ka pasur përpjekje që një pjesë e mjeteve financiare të keqpërdoren nga Albin Kurti dhe qeveria e tij përmes Këshillit Kombëtar, për t’i ‘pastruar’ ato mjete nëpërmjet këtij institucioni”, u shpreh ministri.
Deklaratat e Berishës kanë shkaktuar reagime të ashpra në mesin e përfaqësuesve të komunitetit shqiptar në Luginë të Preshevës, të cilët i konsiderojnë këto qëndrime si përpjekje për të delegjitimuar punën e Këshillit Kombëtar Shqiptar dhe për të ushtruar presion politik mbi institucionet përfaqësuese të shqiptarëve në Serbi./LUGINALAJMI/
