Ministri serb për Integrimin Evropian, Nemanja Staroviq, ka deklaruar se Serbia është e gatshme të bëjë kompromise të mëdha për të avancuar drejt një marrëveshjeje gjithëpërfshirëse me Kosovën, në përputhje me procesin e integrimit në Bashkimin Evropian.
Në një intervistë për mediat serbe, ministri tha se “Serbia duhet të tregojë gatishmëri për zgjidhje të qëndrueshme dhe realiste në raport me Kosovën, nëse dëshiron të ecë përpara në rrugën evropiane”. Ai shtoi se kompromisi nuk do të thotë heqje dorë nga interesat kombëtare, por gjetje e një zgjidhjeje që siguron paqe dhe stabilitet afatgjatë në rajon.
Deklarata vjen në një kohë kur dialogu i ndërmjetësuar nga BE-ja mes Beogradit dhe Prishtinës ka hyrë në një fazë vendimtare, dhe presioni ndërkombëtar për arritjen e një marrëveshjeje të detyrueshme ligjërisht është intensifikuar.
Ministri serb theksoi se përparimi në raport me Kosovën është i lidhur ngushtë me përparimin e Serbisë drejt anëtarësimit në BE, duke shtuar se “asnjë vend nuk mund të bëhet pjesë e BE-së me çështje të hapura territoriale”.
