Kryetari i Këshillit Kombëtar Shqiptar, Enke Rexhepi, ka njoftuar sot ndarjen e 92 kuotave dhe bursave të plota për studentët shqiptarë nga Lugina e Preshevës për studime bachelor dhe master në Universitetin Politeknik të Tiranës, si rezultat i një bashkëpunimi të ngushtë ndërinstitucional.
Sipas njoftimit të publikuar nga kryetari Rexhepi, ky angazhim është bërë i mundur falë mbështetjes së Ambasadës së Republikës së Shqipërisë në Beograd, në bashkëpunim me Universitetin Politeknik të Tiranës dhe vetë Këshillin Kombëtar Shqiptar. “Kjo është një mundësi konkrete për arsimim cilësor dhe integrim të mëtejshëm në arsimin e lartë shqiptar për të rinjtë tanë nga Presheva, Bujanoci dhe Medvegja”, theksoi Rexhepi.
Bursat përfshijnë programe në fusha të inxhinierisë, teknologjisë së informacionit, ndërtimit, mjedisit, gjeologjisë dhe arkitekturës, si në nivel bachelor, ashtu edhe master (shkencor dhe profesional). Disa nga drejtimet me më shumë kuota përfshijnë Inxhinierinë Elektronike, Informatikën, Telekomunikacionin, Ndërtimin dhe Gjeodezinë.
Ky zhvillim vlerësohet si një hap i rëndësishëm drejt përforcimit të lidhjeve institucionale dhe akademike ndërmjet Shqipërisë dhe shqiptarëve në Serbi, si dhe një kontribut i drejtpërdrejtë për fuqizimin arsimor të rinisë në Luginën e Preshevës./LUGINALAJMI/
