Kryetari i Trupit Koordinues për Komunat Preshevë, Bujanoc dhe Medvegjë, Aleksandar Martinoviq, ka reaguar ndaj letrës së deputetit Shaip Kamberi, drejtuar Presidentit të Këshillit Evropian, António Costa, si dhe ndaj përgjigjes së ardhur nga Brukseli në lidhje me çështjen e pasivizimit të adresave të shqiptarëve në jug të Serbisë.
Në reagim e tij thuhet se pasivizimi i adresave është një proces administrativ dhe ligjor që, sipas tyre, zbatohet në mënyrë të barabartë në të gjithë territorin e Republikës së Serbisë, pa dallim etnik. Sipas të dhënave të paraqitura nga Trupi Koordinues, nga fundi i vitit 2011 deri në mesin e vitit 2024, janë pasivizuar 647 adresa në Inxhia, 3.863 në Nish dhe 3.022 në Pançevë, duke mohuar kështu çdo përzgjedhje etnike në këtë proces.
Deklaratat e Kamberit janë cilësuar si “të pabazuara, politikisht të motivuara dhe të rrezikshme”, me pretendimin se ato synojnë destabilizimin e komunave Preshevë dhe Bujanoc. Trupi Koordinues ka theksuar se përpjekjet për të lidhur situatën e brendshme në Kosovë me rrethanat në jug të Serbisë janë “veçanërisht alarmante”.
Në reagim të Martinoviqit, gjithashtu thuhet se institucionet shtetërore janë të hapura për dialog konstruktiv me të gjithë aktorët relevantë, por pretendohet se vetë Kamberi po e shmang komunikimin institucional dhe po vepron në mënyrë të njëanshme, duke dëmtuar – sipas tyre – interesat e qytetarëve që përfaqëson.
Kryetari i Trupit Koordinues përmendi disa masa që, sipas tyre, dëshmojnë për përfshirjen e shqiptarëve në institucionet shtetërore: punësimi i dy doktoreshave shqiptare në Qendrën Shëndetësore të Vranjës, vendimi i qeverisë për rinovimin e shkollës “Sami Frashëri” në fshatin Lluçan me vlerë prej 90 milionë dinarësh, si dhe hapja e dy grupeve të reja parashkollore në gjuhën shqipe në Bujanoc.
Gjithashtu, ai theksoi se ministri aktual për të Drejtat e Njeriut dhe Dialog në Qeverinë e Serbisë është i përkatësisë shqiptare, duke u paraqitur kjo si dëshmi e “integrimit të thellë institucional dhe barazisë reale”.
Në përfundim, Martinoviq deklaroi se Republika e Serbisë mbetet e përkushtuar ndaj mbrojtjes dhe avancimit të të drejtave të të gjitha pakicave kombëtare, duke u bazuar – siç thuhet – në standardet më të larta evropiane dhe ndërkombëtare./LUGINALAJMI/
