Drejtori i Zyrës për Kosovë në Qeverinë e Serbisë, Petar Petkoviq, ka reaguar ndaj nismës së deputetit shqiptar në Parlamentin e Serbisë, Shaip Kamberi, i cili ka paraqitur një projekt-rezolutë për pozitën e shqiptarëve në Luginën e Preshevës. Sipas Petkoviqit, përmes kësaj nisme Kamberi po përpiqet të realizojë atë që, siç thotë ai, nuk ia doli negociatori i Prishtinës, Besnik Bislimi, në rundin e fundit të dialogut në Bruksel – që në mënyrë të fshehtë të fusë në dialog tema që nuk janë pjesë e tij.
“Shaip Kamberi, me sa duket nën ndikimin e negociatorit të Prishtinës, po përpiqet të realizojë atë që Besnik Bislimi nuk e arriti në Bruksel, që në mënyrë të pavend dhe të paautorizuar të fusë në dialog tema që nuk janë pjesë e tij. Këtë të dy e dinë shumë mirë. Ashtu siç ia kam bërë të qartë Bislimit se tema e dialogut përcaktohet në bazë të Rezolutës 1244 të OKB-së dhe Rezolutës 64/298, po e përsëris edhe për Kamberin: keqpërdorimi i dialogut është i papranueshëm,” thuhet në deklaratën e Petkoviqit.
Ai shton se Kamberi po shkel Kushtetutën e Serbisë dhe po del me propozime që sipas tij tregojnë jo vetëm mungesë dijesh, por edhe qëllime të këqija.
Petkoviq ka theksuar se Serbia është shembull në rajon për trajtimin e të drejtave të pakicave kombëtare dhe se çdo përpjekje për të politizuar dialogun me Prishtinën nga, siç i quan ai, politikanë të papërgjegjshëm në Serbi, nuk do të ketë sukses.
“Dialogu është vendosur si mekanizëm për të garantuar paqe, siguri dhe stabilitet në rajon, për të nxitur bashkëpunimin dhe për të përmirësuar jetën e qytetarëve në Kosovë, veçanërisht të serbëve dhe komuniteteve tjera jo-shqiptare që përballen me kushte të vështira për shkak të veprimeve të njëanshme të Prishtinës,” shtoi Petkoviq.
Ai përfundon duke thënë se përpjekjet për ta keqpërdorur dialogun për të cenuar stabilitetin dhe bashkëpunimin ndërinstitucional në Serbi i përkasin ideve të tejkaluara politike që, sipas tij, kanë dështuar qysh në mes të shekullit të kaluar.
Deputeti Shaip Kamberi ka dorëzuar në Kuvendin e Serbisë një projekt-rezolutë që kërkon që çështja e pozitës së shqiptarëve në Luginën e Preshevës të jetë pjesë e dialogut ndërmjet Beogradit dhe Prishtinës./LUGINALAJMI/
