-Foto Bujanovacke-
Në konkursin e shpallur nga Administrata Tatimore e Republikës së Serbisë për filialin në Bujanoc, nuk është punësuar asnjë shqiptar.
Lajmin e ka bërë të ditur Rahim Salihi, këshilltar nga radhët e Partisë për Veprim Demokratik (PVD) në Bujanoc, i cili ka theksuar se konkursi i hapur më 16 janar përfundoi me punësimin e katër personave me vendim të përhershëm – tre me shkollë të mesme dhe një me fakultet – të gjithë nga komuniteti serb.
“Edhe ‘poreska’ nuk ka vend për shqiptarët! Konkursi i shpallur më 16 janar nga Administrata Tatimore Shtetërore përfundoi edhe më keq sesa e kishim parashikuar. Në Bujanoc u punësuan 4 punëtorë me vendim të përhershëm: 3 me shkollë të mesme, 1 me fakultet. ZERO (0) shqiptarë! Au!”, ka shkruar Salihi.
Reagim për këtë çështje ka pasur edhe Alban Alili, gjithashtu nga PVD, i cili ka kritikuar pushtetin lokal për propagandimin e multietnicitetit në mënyrë formale, ndërkohë që shqiptarët përjashtohen nga punësimi në institucionet shtetërore.
“Sot morëm vesh që në ‘administratën tatimore’ në Bujanoc, nga 4 të punësuarit, të gjithë janë nga komuniteti serb. Në një komunë ku shqiptarët janë shumicë, pushteti lokal proklamon ‘multietnicitetin’ si mënyrë jetese, por realiteti është se diskriminimi ndaj shqiptarëve vazhdon. Pushteti komunal e propagandon multietnicitetin me bilborda dhe ‘art’, ndërsa qeveria qendrore i përjashton shqiptarët. Kjo e vërteton gjithnjë e më shumë se nevoja për një shumicë komunale vetëm shqiptare ishte dhe mbetet e drejtë”, ka shkruar Alili.
Kjo çështje ka hapur debat të ri mbi përfaqësimin e shqiptarëve në institucionet shtetërore në Luginën e Preshevës, veçanërisht në Bujanoc, ku ata përbëjnë shumicën e popullsisë./LUGINALAJMI/
