-Foto ilustrim-
Numri i nxënësve shqiptarë në shkollat fillore të Luginës së Preshevës ka shënuar rënie të ndjeshme gjatë pesë viteve të fundit. Të dhënat e prezantuara nga kryetari i Këshillit Kombëtar Shqiptar, Enkel Rexhepi, tregojnë se nga viti shkollor 2020/21 deri në vitin 2025/26, numri i nxënësve ka rënë nga 4,059 në vetëm 3,650 – një ulje prej 409 nxënësish, ose rreth 10 për qind.
Rexhepi e lidh këtë trend shqetësues me faktorë të shumtë, duke përfshirë emigrimin e vazhdueshëm, natalitetin e ulët, kushtet e rënda ekonomike, mosnjohjen e diplomave dhe pasivizimin e adresave. Sipas tij, këto zhvillime po vënë seriozisht në pikëpyetje të ardhmen e shkollës shqipe në rajon.
“Rreziku që na kanoset, i cili prek drejtpërdrejt brezat e ardhshëm dhe gjeneratat e reja shqiptare në Luginë, duhet të na bashkojë në një qasje më të guximshme dhe më të vendosur për mbrojtjen dhe zhvillimin e arsimit në gjuhën shqipe”, ka shkruar Rexhepi në një reagim publik./LUGINALAJMI/
