Ashtu siç ishte paralajmëruar, sot në sheshin e Bujanocit u mbajt një marsh përkujtimor e protestues në kujtim të të ndjerit Arbenit Mujaj, i cili humbi jetën muajin e kaluar pas një përleshjeje fizike.
Në marsh morën pjesë familjarë, shokë e shoqe të tij, si dhe shumë qytetarë, të cilët me praninë e tyre shprehën dhimbjen dhe solidaritetin me familjen e të ndjerit. Pjesëmarrësit mbanin pankarta me mesazhe që kërkonin drejtësi dhe ndriçimin e plotë të rastit.
Gjatë marshit u mbajtën edhe disa fjalime, ku u theksua dhimbja e madhe për humbjen e një jete të re, si dhe nevoja që institucionet të ndërmarrin të gjitha hapat e nevojshëm për zbardhjen e ngjarjes. Po ashtu, u bë thirrje që shoqëria të reflektojë dhe të kontribuojë në parandalimin e dhunës, në mënyrë që tragjedi të tilla të mos përsëriten.
Marshi u përmbyll me një ecje para institucioneve lokale dhe atyre të drejtësisë e sigurisë, nën thirrjen simbolike “Dhuna nuk është zgjidhje”.
Kujtojmë se Arbenit Mujaj, 19-vjeçar nga Bujanoci, u vra në fillim të muajit të kaluar – ngjarje e cila tronditi komunitetin lokal dhe ngjalli ndjenjën e përgjegjësisë së përbashkët për të kërkuar një shoqëri më të sigurt dhe më të drejtë./LUGINALAJMI/
