-Foto ilustrim-
Mëngjesin e sotëm disa shkolla në Bujanoc kanë pezulluar mësimin për shkak të paralajmërimeve për vendosje bombash, të cilat kanë mbërritur në adresat elektronike të shkollave.
Deri më tani, paralajmërimet janë dërguar në Shkollën fillore “Branko Radiçevic” në Bujanoc, Shkollën fillore “Bora Stankoviq” në Klenik, Shkollën fillore “Vuk Karaxhiq” në Levosojë si dhe në Shkollën e mesme “Sveti Sava”. Nxënësit dhe stafi janë evakuuar menjëherë, ndërsa njësitë policore po kryejnë kontrolle të detajuara në objektet shkollore.
Sipas informacioneve të portalit tonë, paralajmërime të ngjashme janë regjistruar edhe në shkolla në Vranjë dhe në qytete të tjera të Serbisë. Ende nuk ka informacion zyrtar nëse do të zhvillohet mësimi në ndërrimin e pasdites, pasi drejtorët e shkollave janë në pritje të udhëzimeve nga organet kompetente.
Nga ana tjetër, në shkollat shqipe në Bujanoc, përfshirë Shkollën e Mesme “Sezai Suroi”, nuk ka pasur paralajmërime për bomba dhe mësimi po zhvillohet normalisht.
Ngjarje të tilla janë regjistruar edhe më parë, veçanërisht gjatë vitit 2022, kur shkollat në Bujanoc dhe në Serbi shpeshherë përballeshin me paralajmërime të rreme për bomba./LUGINALAJMI/
