Ministri i Arsimit në Serbi, Dejan Vuk Stankoviq, ka paralajmëruar mundësinë e shkurtimit të orës mësimore nga 45 në 30 minuta, si pjesë e një koncepti të ri për reformimin e sistemit arsimor dhe përshtatjen e tij me mënyrën se si nxënësit e sotëm përqendrohen dhe mësojnë.
Sipas ministrit, kjo ide lidhet drejtpërdrejt me ndryshimin e vëmendjes së nxënësve, të cilën ai e përshkroi si “vëmendje difuze”, më të shkurtër dhe më sekuenciale krahasuar me gjeneratat e mëparshme. Ai theksoi se ndjekja efektive e mësimit kërkon që nxënësi të jetë i përqendruar në prezantimin e mësuesit dhe të marrë pjesë aktive në procesin mësimor.
Përveç shkurtimit të orëve mësimore, Stankoviq foli edhe për kufizimin e përdorimit të telefonave celularë në shkolla, si dhe për përfshirjen më të theksuar të inteligjencës artificiale dhe teknologjive dixhitale në mësimdhënie.
Ai vlerësoi se modeli tradicional i shkollës, ku mësuesi shihej si dërgues i njohurive dhe nxënësi si marrës pasiv, nuk i përgjigjet më realitetit të sotëm. Sipas tij, arsimi modern duhet të kalojë drejt një modeli komunikimi ndërveprues, ku theksi vihet te metodat inovative dhe përdorimi i teknologjisë, me qëllim zhvillimin e mendimit të pavarur te nxënësit.
Ministri theksoi se inteligjenca artificiale dhe mjetet dixhitale duhet të jenë pjesë aktive e procesit arsimor, në mënyrë që sistemi i arsimit t’u përshtatet zhvillimeve të shpejta teknologjike dhe nevojave të reja të shoqërisë./LUGINALAJMI/
