-Foto ilustrim nga Bujanovacke.co.rs-
Komisioni komunal zgjedhor në Bujanoc, sot edhe zyrtarisht ka çertifikuar rezultatet nga zgjedhjet e 2 qershorit.
Sipas rezultateve zyrtare, “Fronti për Ndryshim”, është lista më e votuar në zgjedhjet e 2 qershorit. Lista e Arbër Pajazitit ka marrë 3.494 vota, apo 8 ulëse në Kuvendin e ardhshëm të Bujanocit. E dyta, radhitet Partia Progresiste serbe (SNS), me 3.292 vota, apo 7 vende të siguruar, sa edhe Lëvizja për Progres Demokratik, që ka marrë 3.155 vota. Partia Demokratike e Nagip Arifit, ka marrë 2.508 vota, të përkthyera në 6 këshilltarë, derisa Partia për Veprim Demokratik, ka siguruar 5 këshilltarë, nga 2.080 vota. Lista e Dr.Dejan Stojanoviq, ka marrë një votë më pak se PVD, 2079 sosh, apo ka siguruar 5 ulëse në Asalmblenë e ardhme komunale. Lista rome e që ka garuar nën ambrellën e Partisë së Drejtësisë dhe Pajtimit (SPP të Zukorlliqit), ka marrë 1.128 vota, apo 2 këshilltarë. Një këshilltar të vetëm e ka fituar edhe lista “Ndryshimet tani për fshatin dhe qytetin tonë”, Sasha Arsiq.
Ulëse në kuvendin e ardhshëm të Bujanocit, nuk ka siguruar Lista serbe për Bujanocin e udhëhequr nga Nenad Tasiq dhe Goran Tashkoviq, të cilët gjithsejt kanë marrë 158 vota, të pamjaftueshme për një këshilltar.
Rezultatet japin që në këto zgjedhje, fitues është “Fronti për Ndryshim” i udhëhequr nga Arbër Pajaziti, i cili, tashmë ka nisur thirrjet për partitë shqiptare për themelimin e shumicës së re gjë që, LPD, PD dhe PVD, nuk u janë përgjigjur ftesës. Ditëve në vijim, pritet të ketë bisedime paralele, për krijimin e shumicës së re qeverisëse./LUGINALAJMI/
