Kryetari i Këshillit Kombëtar Shqiptar (KKSH), Enkel Rexhepi, ka reaguar ashpër pas shpalljes së rezultateve të fundit nga konkursi i Ministrisë së Punëve të Brendshme të Serbisë për pranimin e policëve të rinj. Ai ka theksuar se nga Presheva, Bujanoci dhe Medvegja nuk është pranuar asnjë shqiptar, ndonëse në nivel lokal janë pranuar 43 kandidatë në Preshevë dhe Bujanoc, si dhe 22 të tjerë në Medvegjë.
“Ky është një sinjal alarmant që tregon vazhdimin e diskriminimit sistematik të shqiptarëve nga institucionet shtetërore, përkundër marrëveshjeve ndërkombëtare dhe obligimeve të shtetit,” ka deklaruar Rexhepi.
Ai e ka krahasuar këtë situatë me periudhën e vitit 2001, kur shqiptarët ishin tërësisht të përjashtuar nga institucionet e sigurisë në jug të Serbisë. Sipas tij, ky regres i dukshëm është në kundërshtim të plotë me frymën dhe përmbajtjen e Marrëveshjes së Konçulit, e cila synonte pikërisht krijimin e një policie multietnike dhe përfshirjen e shqiptarëve në jetën publike si garanci për paqe dhe siguri të qëndrueshme në Luginën e Preshevës.
Rexhepi ka theksuar se përjashtimi sistematik ka nisur të zbatohet pas vitit 2004, pas një periudhe të shkurtër të përfshirjes së shqiptarëve në polici gjatë viteve 2002–2004. Tani, sipas të dhënave të KKSH-së, nëse ky trend diskriminues vazhdon, përfaqësimi i shqiptarëve në polici rrezikon të zhduket plotësisht për shkak të daljes në pension të kuadrove aktuale dhe mungesës së pranimëve të reja.
“Ne nuk do të ndalemi së kërkuari respektimin e marrëveshjeve dhe garantimin e të drejtave tona si komunitet autokton në këtë pjesë të Serbisë,” ka përfunduar Rexhepi./LUGINALAJMI/
