Këshilltari komunal nga PVD, Ragmi Mustafi, ka reaguar ashpër pas publikimit të një videoje ku ministri për të Drejtat e Njeriut, të Pakicave dhe Dialogun Shoqëror, Demo Berisha, pranon publikisht se ka qenë ai që ka sugjeruar vendosjen e një sistemi bashkëqeverisës 1:1 mes serbëve dhe shqiptarëve në komunën e Bujanocit.
Në deklaratën e tij, Berisha thotë: “Në Ministrinë për të Drejtat e Njeriut dhe të Pakicave duhet të vijmë te një model që është realizuar me sugjerimin tim në komunën e Bujanocit. Atje unë kërkova që pas 22 vitesh të kemi pushtet të ndarë mes shqiptarëve dhe serbëve – konkretisht mes SNS-it (partisë së Vuçiqit) dhe partisë së Shqiprim Arifit, ish-kryetar i Preshevës. Sot, kryetar është Arbër Pajaziti, që e trashëgoi këtë model. Ne shkuam me sistemin e ndarjes së pushtetit një me një.”
Në reagimin e tij shoqërues, Mustafi e cilëson Berishën si “kumbarën e pushtetit në Bujanoc”, duke e akuzuar për ndërhyrje të hapur dhe të papranueshme në vullnetin demokratik të qytetarëve shqiptarë. “Deklarata e ministrit është pranim publik se modeli politik në Bujanoc nuk është produkt i votës së lirë, por i marrëveshjeve të prapaskenës në Beograd,” shkruan Mustafi.
Ky zhvillim hedh dritë mbi mënyrën se si strukturat shtetërore ndikojnë në përbërjen politike të institucioneve lokale në Luginë të Preshevës për një bashkëqeverisje me SNS-in.
Deklarata ka shkaktuar reagime të forta, duke hapur debat mbi autonominë politike të komunave me shumicë shqiptare dhe rolin e ministrave shqiptarë në mbështetjen e projekteve të centralizuara të kontrollit politik./LUGINALAJMI/
