Komuna e Preshevës, njëra nga dy komunat me shumicë shqiptare në Luginë të Preshevës, renditet si më e varfra në Republikën e Serbisë, sipas të dhënave të fundit nga Entit Kombëtar të Statistikave të Serbisë. Në muajin nëntor të vitit 2024, e ardhura mesatare neto për punonjësit në Preshevë ishte vetëm 65,577 dinarë, duke e vendosur këtë komunë në krye të listës së komunave më të varfra në Serbi.
Ndërkohë, komuna e Bojnikut, e cila ndodhet në Rajonin e Jabllanicës, ka pasur një rritje minimale të të ardhurave mesatare, duke kaluar Preshevën vetëm për 16 dinarë. Kjo ka bërë që Presheva të mbetet në vendin e parë për varfëri, ndërsa Bojniku është vetëm një hap përpara, në vendin e dytë të fundit.
Komunat përreth Preshevës gjithashtu nuk kanë një nivel të lartë të të ardhurave, por, krahasuar me Preshevën, ato janë më të përparuara. Për shembull, Vladiçini Han, një tjetër komunë e Pçinjës, ka arritur një mesatare prej 78,630 dinarësh në muajin nëntor, ndërsa Vranja ka pasur 77,064 dinarë.
Ndërkohë që në Beograd, i cili është rajoni më i pasur në Serbi, paga mesatare ka arritur në 128,627 dinarë, më shumë se dyfish i asaj që merr një banor i Preshevës. Kjo diferencë e theksuar mes rajoneve tregon qartë hendekun e madh ekonomik që ekziston në Serbi, duke e bërë Preshevën dhe Pçinjën të vuajnë nga një varfëri ekstreme.
Të dhënat e fundit theksojnë pasigurinë ekonomike dhe sfidat që kanë përballë shqiptarët në këto zona, ku të ardhurat mesatare janë shumë më të ulëta krahasuar me rajonet e tjera të Serbisë. Kjo situatë e vështirë kërkon veprime urgjente nga autoritetet për të përmirësuar kushtejet ekonomike dhe për të adresuar pabarazitë e theksuara që prekin një pjesë të madhe të popullsisë shqiptare në Serbi./LUGINALAJMI/
