Nga mëngjesi i sotëm, Çerdhja e fëmijëve “Gëzimi ynë” në Bujanoc ka hasur në një problem me ngrohjen, për shkak të një mosfunksionimi në sistemin e instalimeve. Drejtori i çerdhesë, Millovan Alleksiq, u ka kërkuar falje prindërve dhe ka apeluar që fëmijët të mos sjellen në kopsht gjatë ditës së sotme, përveç rasteve urgjente.
Ai shpjegoi se gjatë natës ka plasur një tub në kazan, duke shkaktuar ndërprerjen e ngrohjes. “Ne kemi ngrohës dhe kondicionerë, por këto janë zgjidhje të përkohshme. Andaj, ju lutem, mos i sillni fëmijët sot nëse nuk është e domosdoshme,” tha Aleksiç, duke theksuar se ky është një problem që nuk mund të parashikohej. Sipas tij, teknikët janë duke punuar intensivisht për ta rregulluar problemin, dhe pritet që ngrohja të rikthehet brenda ditës.
Prindërit janë ftuar të qëndrojnë të informuar për zhvillimet dhe mundësitë e kthimit të normalitetit në kopsht./LUGINALAJMI/
