Kryetari i Këshillit Kombëtar Shqiptar, Enkel Rexhepi, ka nënshkruar sot kontratat me organizatat që angazhohen për të drejtat dhe mirëqenien e personave me aftësi të veçanta në Preshevë dhe Bujanoc. Kjo mbështetje vjen si rezultat i Thirrjes Publike të shpallur nga KKSH dhe e përkrahur financiarisht nga Qeveria e Republikës së Kosovës, me një fond të përgjithshëm prej 102 mijë euro.
Organizatat që kanë përfituar nga kjo thirrje janë Shoqata e Prindërve dhe Fëmijëve me Aftësi të Kufizuara, Qendra Bashkëveprim, Qendra Era, Drejtoria për Inkluzion, Ti Barabart Unë dhe Qendra Hope. Këto organizata luajnë një rol të rëndësishëm në avancimin e të drejtave dhe integrimit të personave me aftësi të veçanta në shoqëri.
“Ky është një hap konkret drejt mbështetjes dhe fuqizimit të komunitetit të personave me aftësi të veçanta në Luginë të Preshevës, duke kontribuar në përfshirje sociale, barazi dhe dinjitet për të gjithë”, ka shkruar Rexhepi në një postim në Facebook.
Ai gjithashtu ka shprehur falënderim për Qeverinë e Republikës së Kosovës për përkrahjen e çmuar, si dhe mirënjohje për kryeministrin Albin Kurti, zëvendëskryeministrin Besnik Bislimi dhe këshilltarin për Luginën, Ragmi Mustafi.
Ky bashkëpunim shënon një hap të rëndësishëm në drejtim të ndërtimit të një shoqërie më të drejtë dhe gjithëpërfshirëse për të gjithë qytetarët e Luginës së Preshevës./LUGINALAJMI/
