-Foto ilustrim-
Ministria për Evropën dhe Punët e Jashtme (MEPJ) e Republikës së Shqiprisë, ka reaguar me shqetësim të thellë ndaj ndalimit dhe largimit nga territori i Serbisë të dy shtetasve shqiptarë, përfaqësues të shoqërisë civile, të cilët ishin pjesëmarrës në një seminar në Beograd. Më 23 janar 2025, Ambasadori i Republikës së Serbisë, z. Slobodan Vukcevic, u thirr në Ministrinë për Evropën dhe Punët e Jashtme, ku iu shpreh keqardhja për këtë incident dhe shqetësimi për ndikimin negativ të këtij veprimi në lëvizjen e lirë të shtetasve shqiptarë.
Në një njoftim zyrtar, MEPJ theksoi se ky veprim nuk është në përputhje me përpjekjet për ruajtjen e marrëdhënieve të mira fqinjësore dhe se ai ka dëmtuar imazhin e këtyre marrëdhënieve. Ministria kërkoi nga autoritetet serbe sqarime lidhur me rastin dhe theksoi rëndësinë e rishikimit të vendimeve të marra, duke apeluar që të mos lejohet përsëritja e ngjarjeve të tilla në të ardhmen.
Ambasada Shqiptare në Beograd po ndjek me vëmendje të plotë këtë rast dhe po punon për të siguruar mbrojtjen e të drejtave të shtetasve shqiptarë në territorin e Serbisë./LUGINALAJMI/
