-Foto ilustrim-
Një ngjarje e rëndë ka ndodhur gjatë natës së kaluar në Preshevë, ku një person ka mbetur i plagosur rëndë gjatë një përleshjeje masive, pasi, sipas informacioneve të para jozyrtare, kishte tentuar të ndërhynte për të parandaluar përshkallëzimin e konfliktit, shkruan Nova.rs
Sipas burimeve jozyrtare, fillimisht ka shpërthyer një debat i ashpër mes dy personave të nacionalitetit shqiptar, i cili më pas është shndërruar në përleshje fizike. Situata ka dalë shpejt jashtë kontrollit, ndërsa në konflikt është përfshirë edhe një person i tretë, i cili kishte për qëllim të qetësonte situatën dhe të ndante palët e përfshira, përcjell Nova.rs.
Gjatë përleshjes, ai ka pësuar disa lëndime të rënda me mjet të mprehtë.
I plagosuri është transportuar urgjentisht për trajtim mjekësor dhe pak pas mesnate është pranuar në Qendrën Shëndetësore në Vranjë. Sipas informacioneve nga terreni, ai ka marrë plagë të rënda therëse në pjesën e barkut dhe kraharorit, ndërsa mjekët po bëjnë përpjekje maksimale për t’ia shpëtuar jetën.
Institucionet zyrtare deri më tani nuk kanë dalë me ndonjë njoftim lidhur me këtë rast. As policia dhe as prokuroria kompetente nuk kanë konfirmuar zyrtarisht detajet e ngjarjes, ndërsa identiteti i personave të përfshirë ende nuk është bërë publik.
Policia po vazhdon hetimet intensive për zbardhjen e plotë të rrethanave të rastit. Gjatë ditës pritet të mësohen më shumë detaje lidhur me motivin e konfliktit, si dhe nëse personat e dyshuar janë identifikuar dhe arrestuar./LUGINALAJMI/
