-Foto Bujanovacke-
Deputeti i vetëm shqiptar në Kuvendin e Serbisë, njëherësh kryetar i Partisë për Veprim Demokratik (PVD), Shaip Kamberi, ka paralajmëruar se policia multietnike në Luginën e Preshevës dhe Sanxhak po rrezikon të zhduket.
Së bashku me deputetët e Partisë për Veprim Demokratik të Sanxhakut (SDA), Ahmedin Shkrijel dhe Minela Kalender, Kamberi ka inicuar hartimin e një programi të veçantë për punësimin e të rinjve shqiptarë dhe boshnjakë në strukturat policore në të gjitha komunat dhe qytetet ku jetojnë këto komunitete.
Sipas tij, punësimet e deritanishme, veçanërisht gjatë 10 viteve të fundit, nuk kanë garantuar përfaqësim të drejtë, duke ulur ndjeshëm numrin e shqiptarëve dhe boshnjakëve në polici. Kjo, thekson ai, ka sjellë mospërputhje serioze në strukturën e policisë lokale dhe ka cenuar besimin e qytetarëve.
Në iniciativën e dërguar Kryeministrit të Serbisë, deputetët kanë kërkuar që programi i veçantë të zbatohet deri sa përbërja e policisë të reflektojë realisht përbërjen kombëtare të popullsisë në këto zona.
Kamberi ka kujtuar se në vitin 2001, me ndërmjetësimin e OSBE-së, u krijua një model i suksesshëm i policisë multietnike, i cili solli stabilitet dhe besim. “Sot është koha të rikthejmë dhe forcojmë këtë model”, ka theksuar ai.
Ai shtoi se një program i tillë jo vetëm që do të përmirësonte sigurinë, por edhe do të siguronte një pasqyrim të drejtë të strukturës së popullsisë në Luginën e Preshevës dhe Sanxhak./LUGINALAJMI/
