Komuna e Preshevës priti sot në një vizitë zyrtare zëvendëskryeministrin e parë të Republikës së Maqedonisë së Veriut, z. Izet Mexhiti, i cili u mirëprit nga kryetarja e Komunës së Preshevës, znj. Ardita Sinani.
Gjatë kësaj vizite vëllazërore, Mexhiti ishte i shoqëruar nga bashkëpunëtorët e tij të afërt: znj. Miqereme Rusi – këshilltare për arsim, z. Astrit Iseni – zëvendësministër i Punëve të Brendshme, si dhe znj. Feride Haxhiu – deputete në Kuvendin e Maqedonisë së Veriut.
Takimi i zhvilluar në ambientet e komunës u fokusua në forcimin e bashkëpunimit ndërkufitar dhe nxitjen e zhvillimit ekonomik të rajonit, me theks të veçantë në përfshirjen e investitorëve nga Maqedonia e Veriut në Zonën Industriale të Preshevës.
Përmes një postimi në Facebook, kryetarja Sinani bëri të ditur se bashkëbisedimi me delegacionin nga Shkupi përfshiu gjithashtu mundësitë për realizimin e projekteve të përbashkëta përmes fondeve ndërkombëtare, si dhe rëndësinë strategjike të hapjes së vendkalimit kufitar Miratoc–Llojan, që do të mundësonte lëvizjen më të lirë të qytetarëve dhe qarkullimin e mallrave.
Një tjetër temë e rëndësishme që u trajtua ishte mbështetja për studentët nga Lugina e Preshevës që ndjekin studimet në Maqedoninë e Veriut, përmes ofrimit të bursave dhe mundësive për akomodim.
“Kjo vizitë vëllazërore rikonfirmon vullnetin e përbashkët për bashkëpunim afatgjatë dhe përkushtimin për zhvillimin e ndërsjellë të zonave tona”, theksoi kryetarja Sinani./LUGINALAJMI/
