Në kuadër të vizitës së saj në Preshevë, zëvendësministrja për Kulturë, Rini dhe Sport, Daulina Osmani, ka zhvilluar një takim edhe me kryetarin e Këshillit Kombëtar Shqiptar (KKSh), Enkel Rexhepi. Pas takimit, Rexhepi ka ndarë detaje mbi natyrën e diskutimeve me zëvendësministren Osmani, duke theksuar rëndësinë e bashkëpunimit për zhvillimin e kulturës, rinisë dhe sportit në Luginën e Preshevës.
Në një postim në Facebook, Rexhepi shprehu kënaqësinë e tij për mikpritjen e Znj. Osmani në KKSh, duke nënvizuar se gjatë këtij takimi, u diskutua për bashkëpunimin dhe koordinimin e aktiviteteve në këto fusha. Ai theksoi se mbështetja për Luginën e Preshevës ishte në qendër të bisedimeve.
Sipas Rexhepit, Znj. Osmani siguroi se bashkëpunimi mes institucioneve të Kosovës dhe Këshillit Kombëtar Shqiptar do të thellohet dhe konkretizohet me vepra të prekshme, të cilat do të kontribuojnë në përmirësimin e kushteve për qytetarët e Luginës së Preshevës.
Ky bashkëpunim, siç theksoi Rexhepi, është një hap përpara drejt krijimit të mundësive të reja për rininë e kësaj zone, promovimit të trashëgimisë kulturore dhe forcimit të unitetit kombëtar, si dhe rritjes së lidhjeve mes Kosovës, Shqipërisë dhe Luginës./LUGINALAJMI/
