Ashtu siç ishte paralajmëruar ditë më parë, tashmë është konfirmuar edhe zyrtarisht. Ish-kryetari i Këshilli Kombëtar Shqiptar, Ragmi Mustafi, do të jetë pjesë e garës zgjedhore në Kosovë.
Ai është përfshirë në listën e Lëvizja vetëvendosje për zgjedhjet parlamentare, ku mban numrin 46.
Pas publikimit të listës së kandidatëve, ka reaguar edhe vetë Ragmi Mustafi nga Tërnoci, i cili përmes një mesazhi publik ka falënderuar qytetarët për besimin dhe mbështetjen ndër vite.
“Privilegjin më të madh në jetë e kam pasur gjithmonë besimin e njerëzve dhe mundësinë për t’u shërbyer shqiptarëve. Nga Lugina e Preshevës, në çdo angazhim qytetar, politik e institucional, kam bartur me vete të njëjtin besim dhe të njëjtën përgjegjësi. Sot, me nder të madh dhe krenari jetësore, jam pjesë e garës për deputet në Kuvendin e Republikës së Kosovës në listën e Lëvizjes VETËVENDOSJE! Faleminderit secilit për besimin, mbështetjen dhe rrugëtimin e përbashkët. Na priftë e mbara”, ka shkruar Mustafi.
Kandidimi i tij po shihet si një përfaqësim i zërit të shqiptarëve të Luginës së Preshevës edhe në skenën politike të Kosovës./LUGINALAJMI/
