Ragmi Mustafi nga Partia për Veprim Demokratik (PVD) ka njoftuar përmes një postimi në Facebook se është emëruar sërish këshilltar politik për Preshevë, Bujanoc dhe Medvegjë në Qeverinë e Republikës së Kosovës.
Sipas njoftimit të tij, vendimi është marrë nga Kryeministri i Republikës së Kosovës.
“Me vendim të Kryeministrit të Republikës së Kosovës vazhdoj detyrën si Këshilltar Politik për Preshevë, Medvegjë dhe Bujanoc,” ka shkruar Mustafi.
Ai ka falënderuar Kryeministrin Albin Kurti për besimin e rikonfirmuar dhe përkushtimin që institucionet e Kosovës po tregojnë ndaj çështjeve që prekin shqiptarët në Luginën e Preshevës.
Në mandatin e kaluar, Mustafi ka ushtruar detyrën e këshilltarit të zëvendëskryeministrit të Kosovës, Besnik Bislimi, duke qenë i angazhuar në trajtimin e çështjeve që lidhen me shqiptarët e Luginës së Preshevës. Ai konsiderohet si një ndër kuadrot më të përgatitura dhe më aktive politike nga Lugina e Preshevës.
Mustafi ka theksuar se e konsideron nder vazhdimin e kësaj përgjegjësie, duke shtuar se “kufijtë administrativë nuk mund të kufizojnë përgjegjësinë kombëtare”.
“Të drejtat e shqiptarëve në Preshevë, Medvegjë dhe Bujanoc nuk janë çështje e jashtme e Kosovës. Janë provë e karakterit të saj politik,” thuhet më tej në reagimin e tij.
Në fund të postimit, ai ka theksuar se puna do të vazhdojë./LUGINALAJMI/
