Pas një sëmundje të gjatë, në moshën rreth 81 vjeçare, mbrëmjen e së shtunës (dje), ka ndërruar jetë Rexhep Sefedini, i njohur si “Rexha Karambolli”.
Ai ishte një nga automekanikët e parë dhe më të njohur, jo vetëm në Bujanoc, por edhe jashtë tij. Me pasionin dhe përkushtimin e tij, Rexhep Sefedini e shndërroi zanatin e automekanikës në një biznes të fuqishëm, “Karambolli Trade”, i cili njihet për tregtimin e pjesëve të automjeteve dhe është një nga furnizuesit kryesorë në këtë fushë.
Aktualisht dy djemtë e tij, Orhani dhe Irjani, udheheqin me shumë sukses dy bizneset të kësaj fushe në Bujanoc dhe Prishtinë, gjithnjë nën ombrellën e emrit “Karambolli”, të themeluar para shumë dekadave.
Aga Rexhë, siç njihej në tërë rajonin, ishte gjithashtu një mbështetës i madh i arsimit. Ai e shkolloi djalin e tij të madh, Erduanin, me shumë pasion, dhe sot ai është një ndër endokrinologët më të njohur në Prishtinë.
Rexhep Sefedini ka lënë pas vetes bashkëshorten Zaiden dhe tre djemtë e tij: Dr. Erduanin, Orhanin dhe Irjanin, si dhe nipat dhe mbesat, të cilët janë të mirëarsimuar, shumica në fushën e mjekësisë.
Varrimi i të ndjerit do të bëhet sot (e dielë), pas namazit të ikindisë, në varrezat e lagjes së Strukarëve në Tërnoc./LUGINALAJMI/
