Deputeti popullor shqiptar në Parlamentin e Serbisë dhe kryetari i PVD-së, Shaip Kamberi, ka dorëzuar sot materiale të rëndësishme në Institutin për Krime Lufte në Prishtinë, që dëshmojnë diskriminimin maltretimet dhe vrasjen e civilëve shqiptarëve në Luginën e Preshevës para, gjatë dhe pas luftës në Kosovë.
Në një postim në rrjetet sociale, Kamberi tha se dokumentet përfshijnë materiale arkivore, fotografi dhe raporte zyrtare të mbledhura gjatë kohës kur ai ishte kryetar i Këshillit për të Drejtat e Njeriut në këtë rajon.
“Materialet e dorëzuara sot janë rezultat i punës dhe angazhimit tim në Këshillin për të Drejtat e Njeriut në atë kohë dhe të njëjtat, nga sot, do të jenë pjesë e Institutit për Krimet e Kryera Gjatë Luftës në Kosovë”, theksoi Kamberi.
Ai falënderoi znj. Kimete Haxholli për bashkëpunimin dhe u bëri thirrje të gjithë qytetarëve të Luginës së Preshevës që posedojnë dokumente, fakte apo fotografi lidhur me krimet e kryera, t’i dorëzojnë në këtë institut me qëllim të dokumentimit dhe zbardhjes së së vërtetës.
