Zyrtarët e Doganës së Kosovës kanë zbuluar mjete monetare të padeklaruara në valuta të ndryshme gjatë një kontrolli në pikëkalimin kufitar në Jarinjë. Automjeti u ndalua për kontroll në hyrje të Republikës së Kosovës, pasi pala kishte deklaruar se nuk posedonte asgjë për deklarim doganor.
Gjatë kontrollit të detajuar të automjetit dhe gjërave personale, doganierët gjetën mjete monetare në euro dhe dinarë serbë (RSD), të cilat nuk ishin deklaruar. Pas numërimit dhe konvertimit sipas kursit zyrtar, vlera totale e mjeteve të zbuluara arriti në 10.202,27 euro.
Në përputhje me legjislacionin në fuqi, për rastin është njoftuar hetuesi kujdestar, ndërsa është realizuar konfiskimi i 25 për qind të vlerës së mjeteve monetare të padeklaruara. Palës i është lëshuar vërtetimi përkatës për gjobë dhe konfiskim, ndërsa rasti është trajtuar sipas procedurave ligjore në fuqi.
Nga Dogana e Kosovës bëhet e ditur se zbatimi i ligjit dhe forcimi i kontrolleve kufitare mbeten prioritet, me qëllim parandalimin e shkeljeve doganore dhe mbrojtjen e rendit financiar dhe interesave të Republikës së Kosovës./LUGINALAJMI/
