Një pjesëtar i policisë së Serbisë është arrestuar nga autoritetet në hyrje të pikës kufitare në Jarinje.
Sipas portalit Periskopi, gjatë kontrollit të automjetit të tij me targa të Beogradit, zyrtarët kanë gjetur dhe konfiskuar 51 fishekë, si dhe 9.900 euro para të gatshme dhe 26 mijë dinarë serbë.
I dyshuari ngarkohet me veprën penale “Importi, eksporti, furnizimi, transporti, prodhimi, këmbimi, ndërmjetësimi ose shitja e paautorizuar e armëve apo materialeve plasëse”.
Në raportin e policisë thuhet se gjatë bastisjes janë sekuestruar dokumente personale të shumta, përfshirë kartelën e identifikimit dhe distinktivin e policisë së Serbisë, kartelën e sindikatës së policisë, letërnjoftime të Serbisë dhe Kosovës, pasaportën e Serbisë, si dhe një palë spaleta, dorëza dhe një USB.
Me vendim të prokurorit, i dyshuari është dërguar në mbajtje deri në sqarimin e plotë të rastit./Periskopi
