Një aksident i rëndë trafiku ka ndodhur herët në mëngjesin e sotëm në autostradën Beograd–Nish, pranë nyjës Umçari, ku si pasojë kanë humbur jetën dy persona, ndërsa një tjetër është plagosur rëndë.
Sipas raportimeve të mediave serbe, aksidenti ka ndodhur kur një automjet i markës “Seat”, me targa gjermane, për arsye ende të paqarta ka dalë nga rruga. Dyshohet se drejtuesi i mjetit ka humbur kontrollin, duke u përplasur me gardhin mbrojtës dhe sinjalistikën rrugore përgjatë autostradës.
Nga aksidenti kanë mbetur të vdekur shoferi dhe bashkëudhëtarja e tij, një burrë dhe një grua, të cilët sipas mediave serbe janë shtetas të Maqedonisë së Veriut. Një pasagjer tjetër nga i njëjti automjet është dërguar me urgjencë në spital dhe ndodhet nën kujdes mjekësor për shkak të lëndimeve të rënda.
Autoritetet policore serbe kanë nisur hetimet për zbardhjen e plotë të rrethanave të aksidentit, ndërsa shkaku i saktë do të përcaktohet pas përfundimit të ekspertizës.
Nga ana tjetër, portali “Kumanova Sot”, duke cituar burime jozyrtare dhe duke u bazuar në raportime të mediave shqiptare, njofton se viktimat dyshohet të jenë nga fshati Mateç i komunës së Likovës, respektivisht nga rajoni i Kumanovës. Sipas këtyre informacioneve jozyrtare, bëhet fjalë për një burrë dhe një grua nga një familje e njohur në këtë zonë, familja e një profesori me inicialet (L.).
Deri në këto momente, identiteti i viktimave dhe origjina e tyre nuk janë konfirmuar zyrtarisht nga autoritetet kompetente, ndërsa pritet që institucionet përkatëse të dalin me informacione shtesë gjatë ditës./LUGINALAJMI/
