Ish kryeministri i Kosovës, Avdullah Hoti ka bërë të ditur se synon të marrë drejtimin e Lidhjes Demokratike të Kosovës, duke vlerësuar se “ka ardhur koha” që kjo parti të rikthehet si forcë kryesore politike në vend.
Përmes një postimi në Facebook, Hoti – ish-kryeministër i Kosovës në periudhën 2020–2021 – ka njoftuar se në Kuvendin e LDK-së, i cili do të mbahet më 31 janar, do të kërkojë mbështetjen e delegatëve për të udhëhequr partinë. Sipas tij, kandidimi vjen pas dorëheqjes së kryetarit aktual, Lumir Abdixhiku, e cila u ofrua si pasojë e rezultatit të fundit zgjedhor.
Hoti e sheh këtë moment si një pikë kthese për LDK-në, duke lënë të kuptohet se partia ka nevojë për një riorganizim të thellë dhe një drejtim të ri politik, në mënyrë që të rifitojë besimin e elektoratit.
Ndërkohë, kryetari aktual Lumir Abdixhiku pritet që në të njëjtin Kuvend të kërkojë votëbesimin e delegatëve. Ai më herët kishte deklaruar se dorëheqja e tij do të formalizohej vetëm nëse Kuvendi i partisë voton për shkarkimin e tij.
Ende mbetet e paqartë nëse Abdixhiku do ta humbasë votëbesimin dhe nëse Kuvendi i 31 janarit do t’i hapë rrugë një gare të re për kreun e LDK-së, apo do të konfirmojë vazhdimin e udhëheqjes aktuale./LUGINALAJMI/
